Туған анасының алтын бұйымдарын ұрлап, ломбардқа өткізген

Ақмола облысында туған анасының алтын бұйымдарын ұрлап, ломбардқа өткізіп жіберген күдікті жігіт ұсталды, деп хабарлайды ҚазАқпарат.

ІІД баспасөз қызметінің мәліметіне қарағанда, ұрлық 2017 жылдың 16 қарашасы күні Целиноград ауданының Софиевка ауылында жасалған.

Зардап шегуші полицияға белгісіз біреулер оның сандықта тұрған асыл бұйымдарын жымқырып кеткендігін айтып шағымданған. Келтірілген шығын көлемі 160 мың теңгені құрады.

«Жедел іздестіру шарасы барысында 27 қараша күні күдікті ретінде зардап шегуші əйелдің 30 жастағы ұлы ұсталды. Қазіргі кезде күдікті қылмысын мойындады. Оның үстінен ҚР ҚК 188- бабының 1-бөлімі бойынша іс қозғалды.

Сонымен қатар, күдіктінің ұрланған алтын бұйымдарды ломбардқа өткізіп жібергені анықталды», — делінген баспасөз хабарламасында.