Премьер-министрдің орынбасары-еңбек және халықты әлеуметтік қорғау министрі Тамара Дүйсенова Астанаға келетін халық саны реттелетінін түсіндірді.
«Бұрынғы Ақмола қаласы 300 мың адамға ғана есептелген. Бүгінде қала халқының саны 1 миллионнан асты. Жастар оқуға келіп жатыр, жұмыс орындары ашылып жатыр. Елордадағы бүгінгі инфрақұрылым халыққа мүмкіндік бермей жатыр. Егер Астананың көлемі кеңейіп, мүмкіндіктер жасалса, әсіресе, әлеуметтік инфрақұрылым салынса, онда ашуға болады. Қазір осындай шешім қабылдауға тура келеді», — деді Т.Дүйсенова.
Министрдің айтуынша, заң жобасын қала әкімдігі дайындап жатыр.
«Оқуға келгендер, жұмыс істеуге келгендер бар. Мысалы, жұмыс берушілер оларды жұмысқа шақырып, үймен немесе жатақханамен қамтамасыз етсе, онда шектеу болмайды. Қарсылық болмайды. Сіз Астанаға келіп, емделгіңіз, серуендегіңіз келсе, ешқандай қарсылық жоқ. Қайталап айтамын, егер жұмысы болып, оған қажет жағдай жасалса, оған ешқандай кедергі болмайды», — деді Дүйсенова.
JQ-Aqparat