Бүгін Мәжіліс депутаты Азат Перуашев Бірыңғай жинақтаушы зейнетақы қорындағы (БЖЗҚ) зейнетақы жинағы мен инвестициялық табысқа салық салмау туралы ұсыныс айтты.
Шыны керек, осы мәселені көтеретін адам бар ма, жоқ па деген ой бізде баяғыда болған. Өйткені зейнетақы қорынан ақша (өзі жинаған!) алып шыққандардың бәрі 10 пайыз көлемінде жеке табыс салығын төлеуге міндетті. Мәселен, алдыңғы жылы баспана сатып алуға зейнетақы қорындағы ақшасынан кертіп алғандар ЖТС төлеуге міндеттелді. «не үшін?» деген сауалға «себебі бұл сіздің табысыңыз» деген екіұшты жауап берілген.
Депутаттың сөзіне құлақ асайық:
«БЖЗҚ-дағы қаржы – міндетті төлемдер, ал қоғамдық келісім теориясы бойынша міндетті төлемдер салық есебінде жүреді. Міндетті төлемге салық салу – салықтың үстіне салық төлеу. БЖЗҚ-ғы қаржы ел экономикасына жұмыс істейді. Дағдарыс кезінде ол ақша бюджеттің жыртығын жамауға жұмсалады. Сондықтан БЖЗҚ-дағы инвестициялық табысты да, зейнетақы жинағын да салықтан босатуды сұраймыз», — деді Азат Перуашев. Оның ойынша, зейнеткерлер өзі жинаған ақшасын салық төлемей алуға қақысы бар. Өйткені олар көп жылдар бойы ел экономикасына жұмыс істеді.
Ұлттық экономика министрі Әлібек Қуантыров бұл мәселе Салық кодексін талқылау шеңберінде қарастырылады деп мәлімдеді.
Наргүл Мырзахмет