Шымкенттегі ерекше балаларға арналған орталық қандай мүмкіндік сыйлайды?

Шымкент қаласында ерекше білімді қажет ететін балаларға қолдау көрсетіп, олардың қабілетін ашуға жағдай жасайтын мекемелердің бірі – «Мейірім» оңалту орталығы. Мұнда балалардың дамуына бағытталған сан түрлі үйірмелер мен терапиялық сабақтар ұйымдастырылған. Орталықтың жұмысы туралы мекеме басшысы, бас дәрігер Әбдірахмат Ниязқұлов әңгімелеп берді.

– «Мейірім» орталығының басты мақсаты – ерекше қажеттілігі бар балалардың шығармашылық және әлеуметтік әлеуетін толық ашу. Біз әр баланың бойындағы талантты шыңдау арқылы олардың қоғамға бейімделуіне жол ашамыз, – деді Әбдірахмат Ниязқұлов.
Орталықта балалардың шығармашылық қабілетін дамытуға арналған қолөнер, сурет, ән және би үйірмелері тұрақты жұмыс істейді. Бас дәрігердің айтуынша, бұл үйірмелер балаларға тек өнерді үйретіп қана қоймай, өздеріне деген сенімділікті арттыруға септігін тигізеді. «Әр бала сахнаға шығып, қолөнер бұйымын жасап, өз еңбегінің нәтижесін көреді. Бұл олардың өмірге деген құлшынысын оятады», – деді ол.

Еңбек дағдыларын қалыптастыру үшін орталықта шеберлік сабақтары жолға қойылған. Мұнда балалар түрлі қолөнер бұйымдарын дайындап, тұрмыстық еңбекке баулынады. «Бала өзі жасаған затын қолына ұстағанда, оның бойында мақтаныш сезімі оянады. Бұл – оңалту процесінің маңызды бөлігі», – деп түсіндірді бас дәрігер.

Орталықтағы тағы бір маңызды бағыт – жеке және топтық терапия. Логопед, дефектолог, психолог мамандар балалармен жеке және топтық сабақтар өткізеді. Сонымен қатар арт-терапия, музыкотерапия сынды әдістер кеңінен қолданылады. «Музыка арқылы баланың эмоциялық тепе-теңдігін қалпына келтіру, сөйлеу қабілетін жетілдіруде жақсы нәтижелерге қол жеткізіп келеміз», – деді Ниязқұлов.

«Мейірім» орталығы еріктілер мен қайырымдылық жобаларымен де тығыз байланыста. Әбдірахмат Ниязқұловтың сөзінше, еріктілер балаларға сабақ өткізіп, іс-шараларды ұйымдастыруға көмектеседі. «Біздің есігіміз әрдайым ашық. Қайырымдылық қорларымен бірлескен мерекелік кештер мен акциялар жиі өтеді. Бұл балалардың қоғаммен араласуына, жаңа достар табуына мүмкіндік береді», – деді ол.

Инклюзивті қоғам құру мақсатында орталық түрлі әлеуметтік жобаларды жүзеге асыруға да белсенді қатысады. «Біз ата-аналар клубын құрып, ақпараттық-түсіндіру жұмыстарын жүйелі жүргіземіз. Қоғамдық бастамаларды қолдау арқылы ерекше балаларға деген көзқарасты өзгертуді мақсат етеміз», – деп атап өтті бас дәрігер.

Бұдан бөлек, Әбдірахмат Ниязқұлов ата-аналар мен тұрғындарға орталықтың ресми байланыс арналары арқылы қосымша ақпарат алуға болатынын еске салды. «Біздің міндетіміз – ерекше балаларға мейірім мен мүмкіндік сыйлау. Әрбір баланың бақытты, қоғамға пайдалы азамат болып өсуіне жағдай жасау – біздің ең үлкен борышымыз», – деді ол.

Олжас Әбдіхалық