Шымкентте ерекше жандар шахмат пен тоғызқұмалақтан бақ сынасты

Шымкент қаласының Қаратау ауданында 6 шілде – Елорда күніне орай инклюзивті спорттық турнир ұйымдастырылды. «Зияткер Тұран» мектебінде өткен шарада ерекше қажеттілігі бар азаматтар арасында шахмат және тоғызқұмалақ ойындарынан жарыс өткізілді. Турнир Қаратау ауданы әкімінің жүлдесіне арналды.

Іс-шараның салтанатты ашылу рәсімінде аудан әкімі Алмас Абаев қатысушылар мен тұрғындарды елорда мерекесімен құттықтап, инклюзивті қоғам құрудың маңыздылығына тоқталды.

– Құрметті шымкенттіктер! Елорда күні – тәуелсіздігіміздің, бірлігіміздің символы. Бүгінгі турнир – қоғамдағы әр азаматтың, соның ішінде ерекше жандардың да әлеуетін дамытуға мүмкіндік беретін игі бастама. Осындай шаралар арқылы біз бірлік пен өзара түсіністікке негізделген инклюзивті қоғамды бірге қалыптастырамыз, – деді әкім.

Жарысқа көру қабілеті төмен, есту қабілетінде ақауы бар және тірек-қимыл жүйесі бұзылған 38 қатысушы қатысты. Шахмат сайысына 18, тоғызқұмалаққа 20 спортшы тіркелді. Әр ойыншыға 15 минут уақыт беріліп, ойын швейцар жүйесі бойынша жеті айналымнан өтті.

№19 мүгедектігі бар балаларға арналған спорт мектебінің аға жаттықтырушысы Қаламқас Алдажұманованың айтуынша, мұндай жарыстар тек спорттық шеберлікті шыңдап қана қоймай, ерекше жандардың әлеуметтенуіне де жол ашады.

– Турнир қорытындысы бойынша бес үздік ойыншы жүлделі орындарға ие болады. Жеңімпаздар кубок, медаль, арнайы диплом және естелік сыйлықтармен марапатталады, – деді ол.

Тоғызқұмалақтан 22 жыл бойы жарыстарға қатысып келе жатқан Ақжүніс Тайтелиева шараның жоғары деңгейде ұйымдастырылғанын атап өтті.

– Инклюзивті спорттық турнирлер біз үшін ерекше маңызды. Бұл – қоғам назарындағы қамқорлықтың белгісі. Осындай мүмкіндіктер үшін алғысым шексіз. Елордамыз әрдайым биіктен көріне берсін! – деді Ақжүніс Біртайқызы.

Турнир шеңберінде концерттік бағдарлама да ұйымдастырылып, қатысушылар мен көрермендерге көтеріңкі көңіл-күй сыйлады. Жалпы шара инклюзия қағидаттарын насихаттап, ерекше жандардың өмірге құлшынысын арттыруға сеп болды. Сонымен қатар, қала тұрғындарының шахмат пен тоғызқұмалаққа деген қызығушылығын жандандыруға серпін берді.

Бибайша Нұржанқызы, 

Шымкент