Шымкент: Мүмкіндігі шектеулі 1 120 адам жұмыспен қамтылады

Мүмкіндігі шектеулі жандардың қатардан қалмай, толыққанды өмір сүруі үшін олардың жұмыспен қамтылуына жағдай жасалуы қажет.  Шымкент қаласында бұл міндет қалай жүзеге асырылып отыр?  Бұл туралы jasqazaq.kz сайтының тілшісіне Шымкент қалалық мәслихатының төрағасы Бахадыр Мәдәліұлы жан-жақты мәлімет берді.  

Мәслихат депутаты келтірген мәліметтер бойынша, ағымдағы жылы 1 120 мүгедектігі бар адамдарды жұмыспен қамту жоспарланған. Бүгінгі таңда, Еңбек мобильдігі орталығымен 585 мүгедектігі бар адамдар жұмысқа жолданды. Атап айтқанда, 20 адам «Күміс жас» жобасына, 125 адам қоғамдық жұмысқа орнына, 28 адам жастар практикасына, 11 адам әлеуметтік жұмыс орнына, бір адам алғашқы жұмыс орны жобасына, 209 адам тұрақты жұмысқа, 166 адам «Бастау Бизнес» жобасы бойынша және бір адам кәсіптік оқытуға жолданған.

Сонымен қатар, мүгедектігі бар 24 адам жаңа бизнес-идеяларды іске асыруға арналған гранттар алған.

Мүгедектігі бар адамдарды жұмысқа орналастыру үшін биылғы жылға арналған жұмыс орындарына квота белгілеу бойынша 60 жұмыс берушіде 199 жұмыс орны белгіленген. Белгіленген квотаға сәйкес, 76 мүгедектігі бар адам жұмысқа жолданған.

Сонымен қатар, Басқармаға қарасты арнаулы әлеуметтік қызметтер көрсететін коммуналдық мемлекеттік мекемелер жан басына шаққандағы қаржыландыру жүйесіне көшіріліп жатыр.

Арнаулы әлеуметтік қызметтермен қамту мақсатында биылғы жылы қалада екі Орталық ашылуда. Атап айтқанда:

1. «Балауса» №11 балаларға арналған арнаулы әлеуметтік қызметтер көрсету орталығы» КММ-сіүш жастан он сегіз жасқа дейінгі психоневрологиялық ауытқуы бар балаларға 150 жатын-орынға арнаулы әлеуметтік қызметтер көрсетуге арналған;
2. «№12 арнаулы әлеуметтік қызметтер көрсету орталығы» КММ-сі он сегіз жастан асқан психоневрологиялық ауытқуы бар азаматтарға 50 жатын-орынға арнаулы әлеуметтік қызметтер көрсетуге арналған.

Сондай-ақ, Шымкент қаласы жұмыспен қамту және әлеуметтік қорғау басқармасының «Қамқорлық» №8 балаларға арналған арнаулы әлеуметтік қызметтер көрсету орталығы» КММ жартылай стационарлық жағдайда психоневрологиялық ауытқулары бар бір жарым жастан он сегіз жасқа дейінгі мүгедектігі бар балаларға арнаулы әлеуметтік қызметтер көрсетеді. Қазіргі таңда, Орталықта 150 аутизм және басқа да ментальды бұзушылықтары бар мүмкіндігі шектеулі балалар арнаулы әлеуметтік қызметтер алуда.

JQ-Aqparat