Шекарадан заңсыз өтпек болғандар ұсталды

Қазақстандық шекарашылар Ресей Федерациясы аумағына қарай мемлекеттік шекараны заңсыз кесіп өтуге әрекет жасаған бес шетел азаматын ұстады. Ұлттық қауіпсіздік комитетінің баспасөз қызметінің мәліметінше елімізге турист ретінде келгендер Ресейге заңсыз шекараны кесіп өтпек болған.

«ҰҚК ШҚ Батыс Қазақстан облысы бойынша департаментінің шекарашылары 4 тамызда белгіленген өткізу пунктерінен тыс жерден Ресей Федерациясы аумағына қарай мемлекеттік шекараны заңсыз кесіп өтуге әрекет жасаған бес шетел азаматын ұстады. Олар Қазақстан Республикасына әуе жолымен турист ретінде келген. Алдын ала мәлімет бойынша, жақсы өмір сүру жағдайын іздеп Еуроодақ елдеріне жол тартқан. Ұсталғандар Батыс Қазақстан облысы Тасқала аудандық сотының қаулысымен әкімшілік жауапкершілікке тартылып, ел аумағынан шығарылды», — деп мәлімдеді ҰҚК-нің баспасөз қызметі.

JQ-Aqparat