Шалқар маңындағы республикалық автожолдың 30 шақырымы пайдалануға берілді

29 қыркүйек, 16:27

Қандыағаш–Ембі–Шалқар–Ырғыз тасжолының кезекті бөлігі іске қосылды. 194–224 шақырым аралығында енді барлық көлік түрлеріне жол ашық.

Ресми ашылу салтанатына Қауылжыр мен Мөңке би ауылдарының ақсақалдары мен белсенді тұрғындары, сондай-ақ депутаттар мен қоғамдық ұйым өкілдері қатысты.

Мердігер «АссанаДорСтрой» ЖШС қазан айында тағы 30 шақырымды аяқтап- тапсыруды жоспарлап отыр. Осылайша, Қотыртас пен Қауылжыр ауылдарының арасындағы жөнделген жолдың ұзындығы 60 шақырымға жетеді.

Аймақтың ірі елді мекендерін байланыстыратын республикалық маңызы бар жолдың орташа жөндеу жұмыстары 2023 жылы басталған-ды. III техникалық санаттағы бұл жол 60 жыл бұрын салынған.

Қандыағаш–Ембі–Шалқар–Ырғыз тасжолының ұзындығы – 401 шақырым. Былтыр Шалқар қаласы мен Қауылжыр ауылының аралығы (224–259 км), сондай-ақ Ырғыз ауылынан Самара–Шымкент трассасына дейінгі (391–401 км) учаскелер жөнделді.

Биыл 110 шақырымда жұмыстар жүріп жатыр:

•Қандыағаш–Ізімбет елді мекендерінің арасындағы 0–25 км және 25–50 км учаскелерінде («АссанаДорСтрой» ЖШС мердігері);

•Қотыртас–Қауылжыр аралығындағы 164–224 км учаскесінде («АссанаДорСтрой» ЖШС мердігері).

Ал Ізімбет–Бершүгір–Қотыртас ауылдарының арасындағы (50–92 км және 148–164 км) жол бөліктерін орташа жөндеу 2026 жылға жоспарланған.

JQ-Aqparat

Сурет: Ақтөбе облысының әкімдігі