Премьер-Министр халықты көмірмен қамтамасыз ету мәселесін қадағалауды тапсырды

Премьер-министр Олжас Бектеновтің төрағалығымен өткен Үкімет отырысында елімізде жылыту маусымының басталуына қатысты мәселелер талқыланды, деп хабарлайды jasqazaq.kz Үкіметтің баспасөз қызметіне сілтеме жасап.

Ағымдағы жағдай туралы Премьер-министрдің бірінші орынбасары Роман Скляр баяндады.

Бүгінде өңірлердің басым бөлігінде жылу беру маусымы уақытылы басталды. Еліміздің оңтүстігінде жылу бекітілген кестеге сәйкес және ауа райына байланысты беріледі. Өткен Үкімет отырысынан бері 1 энергоблок, 10 қазандық, 12 турбина, 29 шақырым жылу желілері, 828 электр желісі және 16 қосалқы станса жөнделді.

Премьер-министр өңір әкімдеріне жылу беру маусымын тікелей бақылауға алуды тапсырды.
Олжас Бектенов: «Жылу көздеріндегі барлық жоспарлы параметрдің сақталуын, отынның нормативтік қорын қадағалап отыру қажет. Резервтік жабдықтардың әзірлігін қамтамасыз етіңіздер.

Коммуналдық қызметтердің жөндеу бригадалары кез келген жағдайға шұғыл әрекет етуге тиіс. Сондай-ақ халыққа арналған көмір бағасының тұрақты болуын да бақылауда ұстау қажет»,
— деп атап өтті.

JQ-Aqparat
Сурет: Үкіметтің баспасөз қызметі