Премьер-Министр: Бизнесті шектен тыс тексеруден қорғау күшейтіледі

Бүгін Президенттің 2025 жылғы Жолдауын жүзеге асыру жөніндегі шараларға арналған Үкімет отырысында Олжас Бектенов экономикалық блоктағы тапсырмаларды орындауға баса назар аударды, деп хабарлайды jasqazaq.kz.
Үкімет басшысы Президент мемлекеттік секторды реформалау бағытында нақты ұсыныстар дайындауды тапсырғанын атап өтті:
«Ұлттық экономика министрлігі мемлекеттің экономикадағы үлесінің нақты шегін және басқаруға қойылатын құқықтық талаптарды заңнамалық тұрғыдан бекітуге тиіс.
Бюджеттік бағдарламалар әкімшілері қаражатты уақтылы игеруді қамтамасыз етуі қажет. Қаржылық тәртіпті күшейтіп, бекітілген бюджет параметрлерін қатаң сақтау және әрбір теңгені барынша тиімді пайдалануға күш салу керек».
Сонымен қатар бизнесті шектен тыс тексерістерден қорғау үшін Міндетті талаптар тізілімінің маңыздылығы атап өтілді.
Осыған байланысты Премьер-министр Ұлттық экономика министрлігіне Стратегиялық жоспарлау және реформалар агенттігімен бірлесе Интеллект арқылы реттеу орталығының құрылуын ескере отырып, Міндетті талаптар тізілімін толыққанды енгізуді тапсырды.
Сондай-ақ нормативтік актілерге ревизия жүргізіп, олардың Кәсіпкерлік кодексіне сәйкестігін анықтау қажет.
Олжас Бектенов шағын және орта бизнесті қорғау мен ынталандыру басты орынға қойылуы керектігін атап өтті.
JQ-Aqparat
Сурет: Үкіметтің баспасөз қызметі