Питер Фостер келесі жылы қызметінен кетеді

1 қазанда Air Astana компаниясын басқарғанына 20 жыл толғанын атап өткен Питер Фостер қызметінен кететін болды, деп хабарлайды jasqazaq.kz.
Әуе компаниясы баспасөз қызметінің мәліметінше, 2026 жылдың наурыз айында бұл лауазымға қазіргі қаржы директоры Ибрахим Жанлыел тағайындалады.
Директорлар кеңесі жаңа басшының компаниядағы көпжылдық тәжірибесін және оның дамуына қосқан елеулі үлесін жоғары бағалаған көрінеді.
Сондай-ақ хабарламада: «Питер Фостердің 20 жылдық басшылығы кезінде компанияны өңірдегі жетекші әуе тасымалдаушысына және әлемдік деңгейде танымал брендке айналдырды», — делінген.
Еске түсірсек, өткен жылдың соңында Air Astana  басшысы Мәжіліс отырысында оңбай сөз естіген еді. Әуе компаниясына қатысты сын айтқан депутат Еділ Жаңбыршин күле қараған Фостерге: «Күлетін ештеңе емес. Сіз күлмеңіз. Сіз осы жерде отырып алып бізді менсінбей отырсыз. Біз сізге ештеңені түсінбейтін Африкадағы абориген емеспіз. Бұл Парламент, осында халықтың өкілдері отыр», – деп шүйліккен болатын.
Қызметінен кетуіне сол жәйт себеп болған-болмағаны белгісіз. 1 қазанда «Форбста» жарияланған сұхбатында да кететіні туралы сөз жоқ.

Дегенмен Питер Фостер Air Astana-дан біржола кетпейді. Директорлар кеңесінің аға кеңесшісі болып қалады.
JQ-Aqparat
Сурет: @sputnikKZ