Мемлекетке 4,5 млрд теңге залал келтірді делінген «Ordamed» төрағасы іздеуде

«Ordamed» АҚ басқарма төрағасы Еркін Ділімбетовке іздеу жарияланды. Бұл туралы Құқықтық статистика және арнайы есепке алу органдарының порталындағы деректерде көрсетілген, деп хабарлайды jasqazaq.kz.
Іздеу карточкасына сәйкес, Еркін Ділімбетов бір күннен бері іздеуде. Іздестіру ісі 28 қаңтарда Астана қаласында тіркелген. Іздеуді Ұлттық қауіпсіздік комитетінің Сыбайлас жемқорлыққа қарсы іс-қимыл қызметі жүргізіп жатыр.
Еске салайық, 26 қаңтарда ҰҚК Қазақстанда медициналық бұйымдарды жалған өндірудің ауқымды схемасы әшкереленгенін хабарлаған болатын. Сол кезде OrdaMed фармацевтикалық компаниясының басшылары ұсталғаны мәлім етілді.
ҰҚК дерегінше, OrdaMed АҚ басшылығы Қазақстан аумағында өз өндірісі бар екені туралы жалған құжаттарды пайдаланған. Осы құжаттар арқылы халыққа аса қажет 28 медициналық жабдықты мемлекеттік емдеу мекемелеріне жеңілдетілген шарттармен жеткізу бойынша заңсыз преференция алған.
Алайда тергеу барысында дайын медициналық жабдықтардың шетелден жеткізілгені анықталған. Соның салдарынан мемлекетке 4,5 млрд теңге көлемінде залал келтірілген.
Сот санкциясымен OrdaMed АҚ-ның техникалық директоры, бұрынғы басқарма төрағасы және өндірістік басқарма басшысы қамауға алынған еді.

JQ-Aqparat