«Масқара жағдай». ІІМ министрі Қарағандыда болған оқиғаға қатысты пікірін айтты

Бүгін Үкімет сағатынан кейінгі брифингте ішкі істер министрі Ержан Сәденовке  Қарағандыдағы полиция бөлімшесінде жансыз қыздың жанында ес-түссіз күйде табылған полицей туралы сұрақ қойылды.

Министр бұлтармай, ашық жауап берді: «Бұл енді масқара жағдай. Полицейге қатысты осындай күдік туындаған жақсы емес. Қазір қылмыстық іс қозғалды, түрлі версияны тексеріп жатырмыз. Барлық мән-жай толық анықталады, іс менің жеке бақылауымда. Ол жерде полиция қызметкері болғандықтан, бәрін анықтау маңызды. Маған бұл туралы алғашқы минутта хабарланды. Тергеу жүріп жатыр, нәтижесін міндетті түрде хабарлаймыз.

Ол қазір ауруханада. Алғаш табылған кезде комада болған. Қызметінен уақытша шеттетілді. Қылмыстық істі талқыламаймын, себебі тергеу жүріп жатыр. Барлық дерек тексеріледі. Бұл жағдай біздің ведомство үшін жақсы емес. Қоғамның бұл оқиғаға алаңдап отырғанын білемін. Сондықтан мән-жәйі анықталғаннан кейін жұртшылықты хабардар етеміз».

JQ-Aqparat

Сурет: видеодан алынды