Фото: Zakon.kz
11 тамызда журналист, азаматтық белсенді Сандуғаш Дүйсенова ұсталған болатын. Оған Қылмыстық кодекстің 147-бабы 5-бөлігі бойынша айып тағылды. Бұл бап бойынша адамның жеке өмірі туралы ақпаратты таратқандар жазаға тартылады.
С.Дүйсенова кейін өзін полицейлер бөлімшеде шешіндіріп, видеоға түсіргенін жеткізді. Осыған орай ішкі істер министрінің бірінші орынбасары Марат Қожаев түсінік берді. «Бұл — тергеу әрекеті, оның ішінде ғылыми-техникалық құралдар мен видеотүсірілім жүргізу Қылмыстық іс жүргізу кодексінде регламенттелген. Бұл ертең азамат бір затын алып қойды деп айтпауына сенімді болу үшін жасалады. Басқа мақсат – адам органдардың арнаулы бөлімшелеріне түскен кезде кейіннен өзіне дене жарақатын салғанын айтпауы үшін», — деді ол.
Сондай-ақ ол тінту барысында журналистің қасында адвокаты болғанын, Қылмыстық кодексте регламенттелген процедура барлық адамға бірдей екендігін айтты.
JQ-Aqparat