Кондуктор мас күйінде автобусты айдап әкетті

Көкшетау қаласында ішімдікке мас болған кондуктор жолаушылар отырған автобусты айдап әкетті, деп хабарлайды Baq.kz ақпарат агенттігі patrul.kz сайтына сілтеме жасап.

«Көкшетау қаласының ІІБ ЖПҚ жол-патруль полициясы батальоны жолаушылар отырған автобусты тоқтатып, жүргізушінің құжаттарын тексереді. 29 жастағы жүргізуші құжаттарын көрсету үшін сыртқа шыққан сәтте автобус салонына бейтаныс ер адам жүгіріп кіріп, оны айдап әкетеді. Алайда ер адам оқиға орнынан алысқа қашып үлгермеді. Құқық қорғау органдары оны бірден құрықтады», — деп жазады портал.

Автобусты 30 жастағы жергілікті тұрғын айдап әкеткен екен. Тергеу барысында ер адамның кондуктор болып жұмыс істегені анықталды.

Қазіргі таңда аталған фактіге сәйкес ҚР ҚК 1-бөлім, 200-бабы бойынша сотқа дейінгі іс басталды.