Көктем мерекесі Алматы төрінде: Абай алаңындағы концерт пен қолөнер жәрмеңкесі

Алматыдағы Абай алаңында мерекелік концерт жалғасып, қалаға көктемгі жаңару мен қуаныштың ерекше рухын сыйлауда.

Сахнада өнер көрсеткен артистер көрермендердің көңілін көтеріп, ерекше әсер қалдырды. Лара Рысбай өзіне тән жігерлі орындауымен жұртты серпілтсе, Димаш Дәулетовтің нәзік те әсерлі әндері тыңдарман жүрегінен орын тапты. Қала тұрғындары қосыла ән шырқап, би билеп, мерекелік көңіл күйді бөлісті.

Абай алаңындағы мерекелік кеңістік концерттік бағдарламамен шектелмей, ұлттық мәдениетті дәріптейтін орталыққа айналды. Мұнда қолөнер жәрмеңкесі ұйымдастырылып, ұлттық әшекейлерден бастап түрлі сәндік бұйымдарға дейін шеберлердің қолынан шыққан түрлі бұйымдар ұсынылды.

Қолөнершілердің еңбегі қала тұрғындары мен қонақтарының қызығушылығын арттырып, әрбір бұйымнан ұлттық рух пен шынайы шеберліктің табы сезіледі.

Наурыз мерекесіне арналған іс-шаралар күн бойы жалғасып, кешке дейін қонақтарға көтеріңкі көңіл күй сыйламақ.

Алматылықтар мен қала қонақтары осы думанды мерекеге қатысып, ұлттық дәстүрдің бай мұрасын, әсем ән мен көктемгі жаңарудың ғажайып атмосферасын сезінуге шақырылады.

Сурет: Алматы қаласы әкімдігі