КҚК маңында танкерге дронмен шабуыл жасалды

Бүгін Каспий құбыр желісі консорциумына (КҚК) қарасты терминал маңында Қазақстан мұнайын тиеген танкерге дронмен шабуыл жасалды. “Қара алтын” тиелген “MATILDA” кемесін ҚазМұнайГаз-дың( ҚМГ) еншілес компаниясы “Қазтеңізкөлікфлот” ЖШС жалдаған.
ҚМГ хабарлағандай, дрон шабуылынан кейін жарылыс болғанымен өрт тұтанбапты. Экипаж мүшелері де аман-есен. Сондай-ақ, алғашқы тексеруден кейін танкердің жүзуге қабілетті екендігі және әлдеқандай зардап шекпегені анықталыпты.
Ал КҚК терминалында Қазақстан мұнайын тиеу алдағы 18 қаңтарға белгіленген.
Айта кету керек, бұл Каспий құбыр желісі консорциумы арқылы жүзеге асырылатын мұнай тасымалына жасалған алғашқы шабуыл емес. Өткен жылдың 29 желтоқсанында пилотсыз жүзу құралдары Новороссийск порты аумағындағы КҚК инфрақұрылымына шабуыл жасап, мұнай тиейтін қондырғыны істен шығарған болатын.

Jas Qazaq

Сурет: cpc.ru