Мемлекет басшысы Қазақстанның халықаралық өзекті мәселелерді шешу үшін лаңкестік әдістерді қолдануға мүлде қарсы екенін мәлімдеді. Aqorda хабарлағандай, Президент Бішкекте өткен ТМД-ға мүше мемлекеттер басшыларының кеңесінде Таяу Шығыстағы қазіргі ахуалға қатысты пікір білдірді. Қ. Тоқаев «Ондаған жыл бойы шешімін таппай келе жатқан міндеттерді жүзеге асыру үшін бейбіт азаматтарға зорлық-зомбылық көрсетіп, террорлық акциялар жасауға болмайды. Бұл – еш ақтауға келмейтін әрекет», – деді.
Қазақстан Президенті, сондай-ақ, геосаяси қайшылықтардың шиеленісе түскеніне тоқталып, әлем экономикасында тұрақсыздық күшейгенін атап өтті. Мемлекет басшысы осы мәселеге орай, «Қазақстан жаһандық сауда-саттық пен мемлекеттердің әл-ауқатына кері әсер ететін экономикалық санкцияларды қолдануға түбегейлі қарсы» деді.
JQ-Aqparat