Кентауда қоқыс жәшігінен жаңа туған шақалақ табылды

11 желтоқсан, 9:11

Түркістан облысында қоқыс жәшігінен жаңа туған шақалақ табылды. Сұмдық жағдай Кентау қаласында болған, деп хабарлайды jasqazaq.kz КТК-ға сілтеме жасап.

Шала туған баланы безбүйрек ана ештеңеге орамастан қоқысқа тастай салған. Полицейлер баласынан безінген көкек-ананы табу үшін жақын маңдағы бүкіл бейнекамераларды ақтарып, көрдім- білдім дегендерден сұрастырып жатыр. Қаладағы аурухана мен емханаларды да тексеріп жатыр. Жүктілігімен есепте тұрған аналар да түгел сүзгіден өткізіледі. Күдікті табылған жағдайда қылмыстық жауапқа тартылады дейді тәртіп сақшылары.

Сапарғали Тұрманов, Түркістан облысы ПД тергеу басқармасы бастығының орынбасары: — Барлық мән-жайын анықтау мақсатында тергеу жүріп жатыр. Соның нәтижесімен заңға сәйкес тиісті шешім қабылданады. ҚР ҚПК 201-бабына сәйкес, тергеу мүддесіне қатысты өзге ақпарат жария етілмейді.