Елімізде келесі жылғы 1 қаңтардан бастап еңбекке қабілеттіліктен айрылу және асыраушысынан айрылу жағдайлары бойынша әлеуметтік төлемдер мөлшері артады. Бұл туралы Премьер-Министрдің баспасөз қызметі хабарлады.
Тиісті қаулыға Үкімет басшысы Әлихан Смайылов қол қойды.
Құжатта 2024 жылдың 1 қаңтарынан бастап Мемлекеттік әлеуметтік сақтандыру қорынан еңбекке қабілеттіліктен және асыраушысынан айырылу жағдайлары бойынша тағайындалған әлеуметтік төлемдерді 7 пайызға арттыру көзделген.
Аталған қаражат еңбекке қабілеттілікті жоғалтқан 87 мыңға жуық адамды және асыраушысынан айырылған 59 мың отбасын қамтиды.
Бұл мақсаттарға қосымша 5 млрд теңгеден астам қаражат жұмсалады.
Әлеуметтік кодекске сәйкес, Үкімет еңбекке қабілеттіліктен және асыраушысынан айрылу жағдайлары бойынша төлемдердің мөлшерін жыл сайын арттырып отыратынын еске сала кетейік.
JQ-Aqparat