Ірі банктердің қызметкерлері адам ұрлап, күштеп несие рәсімдеген

Әр өңірде адамдарды ұрлап, олардың атына несие рәсімдеген қылмыстық топ ұсталды, деп хабарлайды jasqazaq.kz.

Ақмола облысы прокурорлары анықтағандай, ұйымдасқан қылмыстық топ құрамында 25 адам болған.  Олардың арасында бірнеше банктердің Kaspi Bank, Forte Bank, «Еуразиялық Банк», Jusan bank) қызметкерлері болған. Олардың қатысуымен бес жылдан астам уақыт бойы алаяқтық әрекеттер жасалған.

Ақмола облысының прокуратурасы хабарламасында: «Республика бойынша осындай қылмыстардың құрбаны болғандар 348 адамға жеткен. Келтірілген шығын көлемі 3,7 млрд теңгені құрады. Тергеу барысында қылмыстық жолмен табылған мүліктер анықталды: Алматы қаласындағы пәтерлер мен жер телімдері, қымбат автокөліктер, ірі көлемдегі қолма-қол ақша. Тәркіленгеннің жалпы құны – 2,7 млрд теңге», — деп жазылған.

Қазіргі кезде қылмыстық топ мүшелері түгелдей ұсталып, уақытша ұстау изоляторына қамалған.

JQ-Aqparat

Сурет: Устинка LIVE