Индонезиядан жеткізілген Ақбаян Мұқанғалиева психикалық денсаулық орталығына жатқызылды

Индонезиядан Қазақстанға жеткізілген Ақбаян Мұқанғалиева Атырау облыстық психикалық денсаулық орталығына жатқызылды. Бұл ақпаратты Қарабалиндер отбасының туыстары растады. Марқұм Мақсот Қарабалиннің қарындасы Фаризаттың айтуынша, отбасы мүшелері Сұлтан Сәрсемалиев пен Ақбаян Мұқанғалиеваны көрмеген, тек оның орталыққа түскенін естіген.

Ал күдікті Сұлтан Сәрсемалиевтің анасы Гүлнар Азмұқанованың айтуынша, келіні бұған дейін де дәрігерлердің бақылауында болған. Оның сөзінше, бесінші баласын дүниеге әкелгеннен кейін әйелдің психологиялық жағдайы нашарлап, ем қабылдауға мәжбүр болған. Осыған байланысты олар медициналық тексеріс үшін Түркияға да барған. Сондай-ақ Ақбаян мен Сұлтан 2022 жылдан бері ресми некеде болмағанын айтқан еді.