ЕАЭО министрі: Бізге ешқандай ортақ валюта керек емес!

Еуразиялық экономикалық одақта ортақ валюта құрудың қажеттілігі жоқ. Бұл туралы бүгін Еуразиялық Экономикалық Комиссияның ықпалдастық және макроэкономиканың негізгі бағыттары бойынша алқа мүшесі (министр) Татьяна Валовая мәлім етті, деп хабарлайды ҚазАқпарат.  «Бірыңғай валюта тақырыбы әрдайым көтеріліп келеді. Мен әрдайым айтамын, бізде ортақ валюта енгізу міндеті тұрған жоқ. Біз ол тақырыпты талқылаған да жоқпыз. Бірыңғай валютаны енгізу — утопия емес, антиутопия. Бізге қазір ешқандай валюта керек емес, бізде оны енгізуге алғышарттар да, қажеттіліктер де жоқ», — деп атап өтті ол.  «Біз Еуропалық одақтың тәжірибесін мұқият зерттедік. Біз Еуропалық одақ жасаған қателіктерді жасамауға тырыстық. Еуропалық бірыңғай валютаның енгізілу жолын қарайтын болсақ, қажеттілік пен алғышарттар болғанмен, олар оны тым жеңілдетіп жіберген. Ортақ валюта енгізбес бұрын жасалуы тиіс жұмысты олар валюта енгізілгеннен соң жасап жатыр», — дейді Т. Валовая.  Оның сөзіне қарағанда, ЕАЭО алдында бірыңғай валютаны енгізгеннен гөрі маңызды жоспарларды іске асыру мақсаты тұр.  «Біздің бірінші мақсатымыз — 2025 жылға қарай, ортақ қаржы нарығын құру. Бұл өте биік мақсат. Бұл біздің елдерге өте үлкен экономикалық әсер береді. Екінші мақсат — біздің валюта-қаржы тұрақтылығын қамтамасыз ету. Онсыз ЕАЭО дамуы қиын болады», — деді министр.