Дорбасыз келген Аяз атаны шық бермес Шығайбайға теңеді

Ақтөбе облысының Хромтау ауданында жаңажылдық шыршаға Аяз ата дорбасыз келген. Бұл туралы әлеуметтік желіде жергілікті тілші Бейбіткүн Кәметия жазды.

tilshi.kz хабарлағандай, «Сіз қалтасы (дорбасы) жоқ Аяз ата көрдіңіз бе? Ал, мен көрдім. Шықбермес Шығайбай сияқты дым шығармады. Балалар өлең оқып, əн салып би де биледі. Қолына бір түйір тəтті ұстатпады. Бала қайдан ашылады?», — деп қынжылыс танытты Бейбіткүн Кәметия.

Оның хабарлауынша, Аяз ата балаларды «топпен секіртіп, билетіп қоя салды».

«Жаңа жылдан ғажайып күтетін балалар бұл жолы дағдарыс əбден жүнжіткен Аяз атаға өз өнерлерін көрсетті. Қымбатшылық Аяз ата тұратын мекенге өз əсерін тигізбей қоймапты. Əр баланың билет ақысынан құралған қаражат бюджетіне жұғым да болмай, Аяз атанын ертеңгілікте тек өз бойын көрсетіп кетуге жеткен», — дейді хромтаулық тілші.

Жаңажылдық шыршаны тамашалау үшін әр баладан 500 теңгеден жиналған.