Дәнияр Қасқарауов: Көлсай маңындағы шұрайлы жерлер жекенің қолына өтіп кеткен (Видео)

06 қыркүйек 2023, 13:24

Сыртқа кеткен активтерге іздеу салып, арнайы заң қабылдаған депутаттар енді ел ішіндегі заңсыз қолды болған жерлерді мемлекет меншігіне қайтаруға күш салуда. Бүгін Мәжіліс мінберінде «Көлсай көлдері» Ұлттық паркінің аумағындағы заңсыздықтар мен экологиялық мәселелер сөз болды. Мәжіліс депутаты Дәнияр Қасқарауов Ұлттық парк аумағындағы сатылған, ұзақ жылға жалға берілген барлық жерлердің заңдылығын тексеріп, мемлекет меншігіне қайтару қажет деген ұсынысын ортаға салды.

Данияр Қасқарауовтың Премьер-министрдің орынбасары Тамара Дүйсенованың атына жолдаған депутаттық сауалында: «Алматы облысында Жетісудың жауһары, еліміздегі жеті кереметтің біріне баланған Көлсай көлдері бар. Ұлттық парк аумағындағы ең шұрайлы жерлер кезінде жекенің қолына өтіп кеткен. Басында бұл жерлер Ауыл шаруашылық мақсатқа, шабындық және жайылымға деп берілген.
Енді кәсіпкерлер қонақүй, бассейн, дәмхана салып жатыр. Мәлімет бойынша бірде біреуінің құрылыс салуға рұқсат қағаздары жоқ. Жер мақсатсыз пайдаланылуда. Ал, Ұлттық парк аумағында капиталды құрылыс жүргізуге болмайды деген ережені ешкім елемейді. Құзырлы орындар да оны тексеруге, шара қолдануға құлықсыз», — делінген.

«Ресми мәлімет бойынша соңғы бір жарым жылда «Көлсай» көлдеріне жарты миллион турист келіпті. Көлдің айналасында бос жер жоқ. Айналаның бәріне шамамен үш жүздей киіз үй мен тамақтану шатырлары тігілген. Ешқайсысында дәретхана жоқ. Таулы аймақта кәріз жүйесі болмағандықтан шайынды сулар мен нәжіс жерге сіңіп жатыр. Септик, ассенизатор деген атымен жоқ. Осылайша тұмса табиғаттың экологиясы бұзылуда. Қала берді түтіні будақтаған көліктер көлдің басына дейін барады.
Ал Алматыдағы Медеу мен Шымбұлақ шатқалдарына тек электромобильдердің кіруіне ғана рұқсат берілген. Екеуінің де Ұлттық парк деген мәртебесі бар.
Сондықтан Көлсайға да сондай шектеу енгізбесек, енді 5-6 жылда еліміздегі ең көрікті жерден айырылып қаламыз.
Біз сыртқа кеткен активтерді қайтарамыз деп жаңа заң қабылдадық. Ел ішінде де кезінде қолды болған, арзан бағаға сатылған, заңсыз өзгенің иелігіне өткен осындай шұрайлы, ерекше қорғауды қажет ететін жерлер бар.
Арнайы комиссия құрылып соларға кешенді тексеру керек.
Осы ретте жалғыз Көлсай емес, барлық Ұлттық парк аумағындағы сатылған, ұзақ жылға жалға берілген барлық жерлердің заңдылығын тексеріп мемлекет меншігіне қайтару қажет деп санаймын», — деді Мәжіліс депутаты.
JQ-Aqparat