CDO – Digital Workshop 3.0 семинары басталды

Бүгін Қазақстан Республикасының Цифрлық даму, инновациялар және аэроғарыш өнеркәсібі министрлігі мен «Қазақтелеком» АҚ бірлесіп ұйымдастырған CDO – Digital Workshop 3.0 семинары басталды. Іс-шараға орталық мемлекеттік органдардың, өңірлік цифрландыру басқармаларының өкілдері, ІТ сарапшылар мен салалық серіктестер қатарынан 90-нан астам қатысушы жиналды.

CDO – Digital Workshop семинары үш жыл қатарынан өтіп, цифрлық трансформация мәселелерін талқылайтын, тәжірибе алмасатын және мемлекеттік басқару жүйесін жетілдіруге бағытталған практикалық шешімдер әзірлеуге мүмкіндік беретін тиімді алаң ретінде қалыптасты.

«Цифрлық трансформация – барлық деңгейдегі билік органдарының үйлестірілген әрекетін талап етеді. Бұл семинардың мақсаты – орталық және жергілікті органдар арасында тиімді диалог орнатып, цифрландырудың басым бағыттарын бірге талқылау. Сондай-ақ цифрлық теңсіздікті жою, байланыс сапасын арттыру және ақпараттық қауіпсіздікті қамтамасыз ету бойынша нақты қадамдар жасау», деді ҚР ЦДИАӨМ вице-министрі Досжан Мұсалиев

Биылғы бағдарламаның аясында тоғыз тақырыптық сессия өтеді. Олар: цифрлық инфрақұрылымды дамыту, төмен орбиталық спутниктік технологияларды енгізу, қалалық ортаны цифрландыру, мемлекеттік үдерістерді автоматтандыру және байланыс сапасын арттыру сияқты басым бағыттарға арналған.

Семинар еркін форматта өтуде — негізгі бағыт шынайы мәселелер мен мүмкіндіктерге арналған. Қатысушылар өңірлердегі цифрлық трансформацияны жеделдетуге қатысты кедергілерді, үздік тәжірибелер мен алдағы қадамдарды бірлесіп талқылауда.

JQ-Aqparat
Сурет: цифрлық даму, инновациялар және аэроғарыш өнеркәсібі министрлігі телекоммуникациялар комитеті