Биыл бақытын тапқан жұлдыздар

 Биылғы жылы шаңырақ көтеріп, шаттыққа бөленген әнші мен актер, ақындар мен спортшылар топтамасы…

Жадыраған жаз басталғанда қарымды қаламгер Дидар Амантай мен зор дауысты әнші Гүлбаршын Тергеубекованың шаңырақ көтергені туралы жаңалық жұртшылықты қуантты. Қарым-қатынастарын ұзақ уақыт жасырып келген танымал тұлғалар жақында қызды болған еді. Жазушының өзі бұл жаңалықты «кешігіп жеткен қуанышына» балады.

Сарша тамызда белгілі күйші, шебер домбырашы Асылбек Еңсепов ақ құсын қолына қондырды. 36 жасқа келіп үйленген Асылбектің таңдауы Айжан есімді аруға түскен.

Осы айда Беделхандар әулетінде де  жар-жар айтылған той өтті. Ерболат пен Есболаттың ағасы, «Орда» тобының әншісі Жанболат Беделхан Жұпар қызды жар етті. Тойларын тоқсаныншы жылдардың стилінде өткізуді ұйғарған жас жұбайлар баннердің орнына қабырғаға кілем іліп, есімдерін мақтамен жазған еді.

Қыркүйектің 22-жұлдызында айтыскер ақын Рүстем Қайыртайұлы бойдақтық өмірімен қош айтысты.  Бұл қуанышы туралы ақынның өзі әлеуметтік желіде: «Әке-шешемнің үйленген күнінде үйлену арманым еді. Тура сол күн, сол сағатта неке жүзігін салып, отау тіктім. Енді сол кісілердей бірнеше ұл-қыз өсірсем деген арманның құлағы «қылтиып» тұр»-деп жазған еді еді. Тілегіне жеткізсін дейміз.

Қазан айының басында өнер өлкесінде «Жаяу» әнімен танылған жас әнші Серік Ибрагимов дүркіретіп той жасап, «тәуелсіздігімен» қоштасты. Ол Айнамкөз арумен танымал болғанға дейін танысып, бес жыл көңіл жарастырған.

Серіктен кейін дарынды актриса, отандық «Сырғалым» сериалында басты рөлді сомдаған Жұлдыз Маханова жар атанды. 26 жастағы актриса Қызылорда өңіріне ұзатылған. Бірақ етегінен ұстаған ер азаматының кім екені жөнінде ақпарат жоқ.

Ал қарашада белгілі боксшы Жанқош Тұраров Алматы қаласындағы мейрамханалардың бірінде үйлену тойын өткізді. Былғары қолғап шеберінің қалыңдығы – Клара Иса. Ұзату той тамызда өткен.

Көп ұзамай «Әзіл әлемі» театрының белгілі актері, пародист Аманғали Сыпабеков те үйлену тойын өткізді. Әзілкештің таңдауы Марал есімді аруға түскен.

Биыл тұрмыс құрғандар қатарында Гауһар Әлімбекова да бар. Бірақ әнші тойы әлі өтпегендіктен, етегінен ұстаған азаматын көрсетуді де, суретін жариялауды да жөн көрмепті. Бұл туралы әншінің өзі жақында «Ұят емес» бағдарламасында айтқан болатын.

Кетіп бара жатқан мешін жылы қосақтарын тауып, отбасылық өмірге қадам басқан барша жұпты тағы бір мәрте құттықтаймыз! Бақыттарыңыз баянды болсын!

reactor.inform.kz