Бензин бағасы өспейді!

Еуразия экономикалық одақ шеңберінде мұнай мен мұнай өнімдері нарығын қалыптастыру «баға бірден күрт көтеріледі» деген сөз емес! Энергетика министрлігі әлеуметтік желіде тараған қаңқу сөздерге орай осындай мәлімдеме жасады.
Министрліктің баспасөз қызметі хабарлағандай, 2027 жылдан бастап ортақ нарық құру отын құнын өзге елдердегі бағамен бірден теңестіруді емес, заңнаманы үйлестіруді көздейді. Оның үстіне, елімізде АИ-92 маркалы бензин бағасын өсіруге мораторий жарияланған. Ал нарық талабына сай баға белгілеу туралы шешім экономикадағы нақты ахуал мен тұрғындардың табыс мөлшерін ескере отырып қабылданады. Атап айтқанда, тұтынушыларды «естен тандырып емдеуге» жол берілмейді.
Дегенмен, министрлік біздегі арзан жанар-жағар майды көрші елдерге астыртын жолмен жөнелту және отын тапшылығын қолдан жасау қаупін жоққа шығармайды.
Айта кету керек, АИ-92 маркалы бензин бағасы Қырғызстанда біздің ақшаға шаққанда 250 теңгеге жетсе, Ресейде 400 теңгеден асады. Міне, сондықтан еліміздегі арзан отын «көлеңкелі» экспорт жасайтындардың көз құртына айналып отыр.
JQ-Aqparat

Сурет: zakon.kz