«Күте алмаймыз». Олжас Бектенов үш жылу-электр орталығының құрылысы туралы айтты

Премьер-министр Олжас Бектенов Үкімет отырысынан кейін өтіп жатқан баспасөз мәслихатында Өскемен, Семей, Көкшетау қалаларында салынуға тиіс үш жылу-электр орталығының құрылысына тоқталды.

Премьер-Министр: «Үш ЖЭО бойынша бастапқыда ресейлік серіктестермен бірге іске асыру мүмкіндігі қарастырылды. Әзірге біз Ресей Федерациясынан кепілдендірілген, арзандатылған қаржыландыру ұсыныстары туралы нақты ақпарат алған жоқпыз. Сондықтан біз Көкшетауды өз күшімізбен сала бастадық. «Самұрық-Энерго» да айналысып жатыр. Семей мен Өскеменді айтсақ, Ресей тарабынан жауап күтіп отырмыз. Егер жауап жақын арада болмаса, жобаны өз бетімізбен іске асырудың нұсқаларын да қарастырамыз. Біз күте алмаймыз», — деді.

«Үш ірі жобаны ел бюджеті көтере ала ма» деген сауалға: «Көтереміз. «Самұрық-Энергоның» нарық механизмдері бар. Жылу-электр орталығы да бизнес жоба. Пайдалануға берілгеннен кейін ақша тауып, салған инвестициясын қайтарады», — деп жауап берді.

JQ-Aqparat

Сурет: Үкіметтің баспасөз қызметі