БАҚ мәселесіне қатысты заң жобасы талқыланады

БАҚ мәселесіне қатысты заң жобасы бойынша жұмыс тобының алғашқы отырысы өтеді. Бұл туралы Фейсбуктегі парақшасында Ақпарат және коммуникация министрі мәлім етті.

«Қымбатты достар! Біздің министрліктің сайтына «ҚР кейбір заңнамалық актілеріне ақпарат және коммуникациялар мәселелері бойынша өзгертулер мен толықтырулар енгізу туралы» Заң жобасы орналастырылды. Қолданушыларға ыңғайлы болуы үшін ол салыстырмалы кесте түрінде беріліп отыр. Жоба көпшілік талқылауына ұсынылып отыр. 2 қарашада журналистер мен сарапшылардан, қоғам қайраткерлері мен мемлекеттік органдардың өкілдерінен құралған жұмыс тобының отырысы өтеді. Топ мүшелерінің тізімімен төмендегі сілтеме арқылы таныса аласыздар», — делінген министр жазбасында.

Еске салайық, бұдан бұрын ҚР Ақпарат және коммуникациялар министрлігі аталған заң жобасының Тұжырымдамасы төңірегінде қоғамдық пікірталас ұйымдастырған болатын. Осыған орай жобаны жетілдіруге қатысты көптеген идея, ескертпелер және ұсыныстар түсті. «Құқықтық алаңды жетілдіруге бағытталған сындарлы диалогтың әрі қарай жалғасатынына сенімдімін», — деп жазады Д. Абаев.

ҚазАқпарат