Жамбыл облысында қар құрсауында қалып қойған 147 адам эвакуацияланды, — деп хабарлайды облыстық ТЖД баспасөз қызметі. Сондай-ақ, 23 жеңіл көлік пен 4 жүк көлігінің құтқарылғаны айтылады.
Tengrinews.kz хабарлағандай, «56 адам Б.Момышұлы ауылындағы Герцен мектебінің жылыту пунктіне орналастырылды. Олардың 20-ы балалар. Балалар Айша бибі атындағы орта мектепке жеткізілді. Қазіргі уақытта жолдарды ашу үшін 150 дана техника жұмылды. Зардап шеккендер жоқ», — деді облыстық ТЖД өкілдері.
ТЖД өкілдерінің мәліметінше, қолайсыз ауа райына байланысты Жамбыл облысындағы Айша бибі күзет орнынан бара жатқандағы «Алматы-Ташкент» тасжолы жабылды.
«Қазіргі уақытта «Күйік» пен «Шақпақ-ата» асуында алты жүк көлігі мен он екі жүк көлігі қар құрсауында қалып отыр», — деп хабарлады құтқарушылар.
Еске сала кетейік, осыған дейін Шымкент — Тараз тасжолында ауа райының бұзылып, ондаған жүк көлігі тұрып қалғаны хабарланған болатын. Куәгердің мәліметінше, кептелістің негізгі бөлігі Тараздан шығаберісте екен. Көптеген жүргізуші түннен бері жолда тұрған.