Алматыдағы жаппай жол апатынан 23 адам зардап шекті (Видео)

Алматыда жүк көлігі, үш жеңіл көлік және жолаушылар автобусы ауыр жол апатына ұшырады. 23 адам жарақат алды, деп хабарлайды jasqazaq.kz.

Жол апаты Алатау ауданында 14 шілде күні сағат 18:10 шамасында болған.

ПД баспасөз қызметі хабарламасында: «МАЗ жүк көлігінің жүргізушісі Бұрындай тас жолымен шығыс бағытта келе жатып, рөлді басқара алмай, сол бағытта бара жатқан Mercedes және Kia көліктерімен соқтығысты. Содан кейін қарсы бағыттағы қозғалыс жолағына шығып кетіп, Yutong автобусымен және Subaru жеңіл көлігімен соқтығысты», — делінген.

Жол апаты салдарынан 23 адам зардап шекті, оның ішінде автобус жолаушылары мен Kia жүргізушісі бар. Барлығы медициналық мекемелерге жеткізілді, олардың жағдайы анықталып жатыр.

«Жол апаты бойынша сотқа дейінгі тергеу басталды. Барлық мән-жай анықталып жатыр», — деп хабарлады полиция.

Qumash Telegram каналында апат орнында түсірілген бейнежазба жарияланды.