Алматыдағы пәтер қанға боялды: полиция оқиғаның мән-жайын айтты

22 желтоқсан, 11:31

Әлеуметтік желіде Алматыдағы пәтерлердің бірінде аударылып жатқан жиһаз, сынған ыдыстар және қанға боялған бөлме бейнеленген видео тарады. Хабарламада пәтер иесі клининг компаниясын шақырғаны, ал компания қызметкерлерінің полицияға, полицияның жедел жәрдемге хабарласқаны айтылған, деп хабарлайды jasqazaq.kz.

Алматы қалалық Полиция департаменті пәтерде ауыр немесе аса ауыр қылмыстар тіркелмегенін мәлімдеді.

«Оқиға кеше Алматы қаласының Бостандық ауданындағы пәтерлердің бірінде болғаны анықталды. Тұрғын үйде спирттік ішімдік ішу кезінде екі әпкелі-сіңлілі болған. Сынған шыны бөтелкені абайсыз қолдану салдарынан олардың бірі аяғын кесіп алған. Оқиға орнындағы қанның көп болуы дәл осы жарақатпен байланысты», — деп хабарлады Алматы ПД.