Алматыда жоғалған 18 жастағы Жұлдыз Ерманова табылды

Алматыда із-түссіз жоғалып кеткен 18 жастағы Жұлдыз Ерманова аман-есен табылды. Бұл туралы бүгін Алматы қалалық ІІД баспасөз қызметінен хабарлады.

«Алматыда 1998 жылы туған Ж. С. Ерманованы іздеу мақсатында біздің бөлімшеде құрылған тергеу-жедел тобы оның қайда екендігін анықтады. Ж. С. Ерманова аман-есен табылды. Қазір одан жауап алынып жатыр. Алдын ала деректер бойынша белгілі болғаны, Ж. Ерманова үйден өз еркімен кеткен. Оқиғаның басқа да мән-жайы алдағы іс жүргізу шарасы барысында анықталатын болады», — деді Алмалы аудандық ІІБ бастығының міндетін атқарушы, полиция подполковнигі Рүстем Әбдірахманов.

Естеріңізге сала кетелік, Ж. Ерманованың із-түссіз жоғалғаны туралы арыз Алмалы аудандық ішкі істер басқармасына 2016 жылдың 2 тамызы күні келіп түскен болатын. Белгілі болғанындай, бойжеткен содан бір күн бұрын — 1 тамыз күні кешкі сағат 18:00-де үйден шығып кеткен. Содан қайтып оралмаған. Жұмыс тәртібі бойынша іздеу шараларын ұйымдастыру және жүзеге асыру мақсатында Алмалы аудандық ішкі істер басқармасында арнайы тергеу-жедел тобы құрылды.

Іздеу шарасына еріктілердің де қатысқанын айта кеткен жөн.

ҚазАқпарат