Алматы прокуратурасы: Бажкеноваға жалған ақпарат таратқаны үшін ескерту жасалды

Алматы қаласының прокуратурасы соңғы екі-үш күннен бері бірқатар тұлғалар туралы orda. kz сайтында жарияланған ақпаратқа қатысты мәлімдеме жасады, деп хабарлайды jasqazaq.kz.
Мәлімдемеде былай деп жазылған:
«Соңғы уақытта онлайн-платформаларда жалған ақпараттың таралу деректері тіркелді.
Осындай жарияланымдардан кейін «Orda» ақпараттық-талдау арнасының бас редакторы Г.А. Бажкеноваға қала прокуратурасы Қазақстан Республикасының «Масс-медиа туралы» Заңының талаптарын ауызша және жазбаша түрде түсіндірді.
Сонымен қатар ол ел заңдарын бұзудың жол берілмейтіні және қасақана жалған ақпарат таратқаны үшін Қазақстан Республикасы Қылмыстық кодексінің 274-бабы 2-бөлігінің 3-тармағына сәйкес 3 жылға дейінгі мерзімге бас бостандығынан айыру жазасы көзделгені туралы қатаң ескертілді.
Сондай-ақ азаматты сыбайлас жемқорлық, ауыр немесе аса ауыр қылмыс жасады деп қасақана жалған айыптау деректері бойынша Қазақстан Республикасы Қылмыстық кодексінің 419-бабы 3-бөлігіне сәйкес 8 жылға дейінгі мерзімге бас бостандығынан айыру түріндегі қылмыстық жауаптылық қарастырылатыны түсіндірілді.
Осыған байланысты қала прокуратурасы азаматтарды және бұқаралық ақпарат құралдарын Қазақстан Республикасының заңдарын қатаң сақтауға шақырады және қоғамдық ортада, оның ішінде бұқаралық ақпарат құралдарында жалған, шындыққа сәйкес келмейтін мәліметтерді таратпауға қатаң түрде шақырады».
JQ-Aqparat