Алматы облысында 16 жастағы жасөспірімге жыныстық зорлық-зомбылық көрсеткен күдікті екі әйел қамауға алынды

Денесін шылыммен күйдіріп, қол-аяғын сүюге мәжбүрлеген. Алматы облысында 16 жастағы жасөспірімді жабылып ұрып-соғып, артынан жыныстық зорлық-зомбылық көрсеткен екі әйелге қатысты қылмыстық іс қозғалды, деп хабарлайды jasqazaq.kz КТК-ға сілтеме жасап. 

Екі келіншек алдымен қызды үйінен алдап әкетіп өзен жағасына апарған. Сол жерде ұрып-соғып, жыныстық зорлық-зомбылық көрсеткен. Жасөспірімнің денесін темекі шоғымен  күйдіріп, қол-аяғын сүйдіруге мәжбүрлеп, бар әрекетін телефонға түсіріп алған. Кейін бейнежазбаны таратпау үшін ақша да бопсалаған көрінеді. Ақпараттарға қарағанда, күдіктінің бірі — ауыл округі әкімдігінің қызметкері. Қылмысқа қатысы бар екеуі де ұсталып, уақытша қамау изоляторында жатыр.

Ернар Сайділдин, Алматы облысы ДП ресми өкілі: — Кәмелетке толмаған қызға жарақат салу және жыныстық сипаттағы зорлық-зомбылық әрекеттерін жасау фактісі бойынша қылмыстық іс қозғалды. Екі күдікті әйел құрықталып, уақытша ұстау изоляторына қамалды. Оқиғаның барлық мән-жайын анықтау үшін тергеу жүргізіліп жатыр. Кінәлілер қолданыстағы заңнамаға сәйкес қатаң жауапқа тартылады.