Ақтауда жұрттың үрейін ұшырған күдіктілерді іздеп жатыр

Сурет: Видеодан кадр

«Ақтау мектептерінде жаппай қантөгіс болады» деп. жұрттың үрейін ұшырған күдіктілер іздестіріліп жатыр. Олар әлеуметтік желіге, қаладағы білім ошақтарында лаңкестік болады деген жалған ақпарат таратып, ата-аналар баласын мектепке жіберуге қорқып қалған, деп хабарлайды jasqazaq.kz КТК-ға сілтеме жасап.

Тіпті түнгі мезгілінде қала орталығындағы Ak Kala Mall ойын-сауық орталығына да бомба қойылғанын айтып, жұртты әбден дүрліктірді. Осыдан кейін тәртіп сақшылары тайлы-тұяғы қалмай қаладағы мектептердің жертөлесі мен қуыс-қуысын түгел тексеріп шықты. Тіпті жарылғыш зат қойылды деген сауда орталығын да саперлар тінтіп шыққан. Бірақ ешқандай бомба табылмады. Енді тәртіп сақшылары тұрғындардың зәре-құтын қашырған жазбаның авторын іздестіріп жатыр.

Ілияс Жұмағұлов, Маңғыстау облысы ПД бастығының орынбасары — Маңғыстау облысы полиция департаменті хабарламада көрсетілген барлық мектепті тексерді. Мекемелердің қауіпсіз екені анықталды. Әр нысан бойынша тиісті акті рәсімделді. Қосымша тексеру алдағы уақытта жалғасатын болады.