Әкесін ұрып өлтірген: Полиция келінге де қатысты қылмыстық іс қозғады

12 қыркүйек 2025, 10:33

Жақында Түркістан облысынан тараған сұмдық жаңалық жұртты дүр сілкіндірді. Ер адам өз қарт әкесін ұрып-соғып өлтірген. Бүгін күдіктінің әйеліне қатысты да қылмыстық іс қозғалғаны белгілі болды, деп хабарлайды jasqazaq.kz.

Бұған дейін әлеуметтік желіде ер адамның қарияны ұрып жатқан сәті бейнеленген видео тараған еді. Кадрда қарттың қанға боялған жүзі көрінеді. Жәбірленуші орнынан тұра алмағаннан кейін, күдікті әйелін шақырып, екеуі бірге әкесін сүйреп әкеткен.

Кейіннен бейнежазбада Түркістан облысының тұрғыны мен оның қарт әкесі екені анықталды. Әйелі бұл әрекетке еш қарсылық білдірмеген. Жантүршігерлік кадрларды көрші әйел жасырын түсіріп алған.

Полицияның Tengrinews.kz тілшісіне хабарлауынша, қарияның өлімінен кейін ұлына қатысты ҚР ҚК-нің 106-бабы 3-бөлігі («Денсаулыққа қасақана ауыр зиян келтіру, абайсызда жәбірленушінің өліміне әкеп соққан») бойынша қылмыстық іс қозғалды. Күдікті ұсталып, уақытша ұстау изоляторына қамауға алынды.

Сонымен қатар, ұлының әйеліне қатысты да тергеу жүргізілуде. Қылмыстық іс ҚР ҚК-нің 109-1-бабы 2-бөлігінің 3-тармағы (» кінәлі адамға дәрменсіз күйде екені көрінеу белгілі не кінәлі адамға материалдық жағынан немесе өзгеше түрде тәуелді адамға қатысты жасалған») бойынша қозғалған.