Air Astana ұшағы апаттық сигнал беріп, Алматыға шұғыл қонды

Алматы – Астана бағыты бойынша КС-851 тұрақты жолаушылар рейсін орындау барысында Air Astana пайдалануындағы Airbus A321N
EI-KDG әуе кемесімен авиациялық оқиға орын алды, деп хабарлайды jasqazaq.kz Көлік министрлігінің Азаматтық авиация комитетіне сілтеме жасап.

Air Astana ұшағының салонында түтін пайда болуына байланысты экипаж MAY-DAY апаттық сигналын жариялаған.

Алдын ала мәліметтер бойынша жолаушылар мен экипаж мүшелері арасында зардап шеккендер жоқ.

Қону сағат 07:40-та жүзеге асырылды. Қауіпсіздікті қамтамасыз ету мақсатында Алматы қаласы әуежайының ұшу қауіпсіздігін қамтамасыз етуге арналған өртке қарсы және авариялық-құтқару қызметі жұмылдырылды.

Қазіргі уақытта аталған авиациялық оқиғаның мән-жайларын Көліктегі оқиғалар мен оқыс оқиғаларды тергеп-тексеру департаментінің қызметкерлері нақтылап анықтауда.

JQ-Aqparat

Сурет: airastana.com