jasqazaq.kz
Ақпарат агенттігі

Сектадан сақ болыңыз

08 қантар, 14:59
585

Сектадан сақ болыңыз

Қазақстанда саентология ағымы ағылшын тілі курстары болып тіркеліп, жымысқы әрекетін жасырын жүзеге асырып жатуы әбден мүмкін. Ұйымның мәліметінше, олардың қатарында 9 мың жерлесіміз жүр…

Саентология 1950 жылы Америкада пайда болды. Ұйымның негізін салған Рон Хаббард. Шетелдерде саентология шіркеуінің құқықтық мәртебесі әртүрлі. Кей елдерде діни үйым ретінде мойындалғанымен, әлем халқы оған шошына қарап отыр. «Мәскеудің саентология шіркеуі» және «Санкт-Петербург саентология шіркеуі» ұйымдарына Ресей соты тыйым салған.
Әлемнің қоғам, дін қайраткерлері, ғалымдары, мемлекеттік және медициналық ұйымдары саентологияның гуманитарлық, діни, философиялық қызметін жоққа шығарып, оған тоталитарлық секта деп баға берді. Ең сорақысы – саентологияның әдістері адам ағзасы мен психикасын күйретеді. Соның салдарынан, көптеген адамдар өз-өзіне қол жұмсап, өмірмен қоштасуда.

Саентологияның сан соқтырар құрсауына түсіп қалғандар елімізде де болды. 2009 жылы Қарағанды облысының ауданаралық экономикалық соты Қарағанды қаласындағы шіркеуіне тыйым салды. Тіпті сот үкіміне бұл ұйым табанды түрде қарсылық көрсетті. Өйтпегенде ше, дүние жүзінде 7 700-ден астам шіркеуін ашып тастаған болса! Сананы улаған ұйым елімізден 9 мыңдай тұрғынды қатарына тартқанын айтып, жар салғаны мәлім. Алматы, Семей және Павлодарда орналасқан шіркеулері қызмет еткен. 2012 жылы Дін істері агенттігінің сараптамасы нәтижесінде «Саентология шіркеуі» діни бірлестік деген мәртебесінен ресми түрде айырылды.

Саентологияның негізін салған америкалық Рон Хаббардтың утопиялық идеясы жаһанға лезде тарап үлгерді. Хаббардтың саентологияға негізделген 148 том кітабы бар. 1950 жылы «Дианетика: рух саулығы жайлы заманауи ілім» атты кітабын жарыққа шығарып, оны психологиялық еңбек деп таныстырды. Бірақ дианетиканың қараңғыға бастайтынын сезген ғалымдар бірден тойтарыс берген. Хаббардтың тауы шағыла қоймады. Діннің адам санасына айрықша әсер ететінін жақсы білді. 1955 жылы «Саентология» шіркеуі Лос-Анджелесте ашылды. Дианетика өңін өзгертіп, дүмбілез әлемге жол ашты. Хаббард «саентология» сөзін Канзас штатындағы Вичит қаласында оқыған дәрісінде алғаш тілге тиек еткен. Фантаст-жазушының діни философиясының күңгірт мазмұнына үңіліп көрсек, адам рухы мәңгі өмір сүретінін әр пенде, жан мен тәнге өзі иелік ете алатынын алға тартқан. Ғалымдар Рон атап көрсетпесе де, бұл ілімге реинкарнация ұғымы өзек болғанын сараптап айтқан. Оның дәлелдеуінше, әлемдегі адамның бәрі жақсы, өз болмысымен біте қайнасып өмір сүреді, тіпті рухы шыққан соң тәнін емдей алады-мыс. Қай секта болмасын, жан сұлулығы, адамның бақиға ұмтылуын жүзіктің көзінен өткен жібектей судыратып, түсіндіріп беруі мүмкін. Бірақ асықпаңыз! Саентология адамға бақыт сыйлайтын емес, көкірек көзін бітеп, улы утопиялық білімді заң шеңберінен тыс психологиялық және медициналық тәсілмен санаға сіңіретін, саңырау күйге түсіретін қара құрдым болып шықты.

Салықтан жалтарған

Ұйымға елітушілер саны 10 миллионға жетіп жығылатынын кейбір дереккөздері растайды. Саентологияға деген құштарлық әсерімен әр табынушы қаржылай көмек көрсетуі тиіс болған.

Хаббардтың бір еңбегінде: «Мүмкіндігінше, ақша тап. Қол астыңдағыларды да ақша табуға көндір» деген үгітін жазған. Сананы сансыратып, талайға сан соқтырған саентология ілімін үгіттеген «Рухани технология шіркеуінің» 1987 жылғы бір жылдық табысы 503 миллион доллар болған. Бұл цифрға көз жүгірткен адам дүбәра діни жолды желеу етіп, ессіз күйде елітіп, қаржы табу пиғылын шебер жүзеге асырып жатқанына кәміл сенері анық.

Германия, Бельгия, Франция елдері саентологтардың ұйымдарын әшкерелеп, олардың жетекшілерін сотқа тартты, түрлі жазалау шараларын қолданды. Қазақстанда бұл діни ұйымға қарасты 11 шіркеу жұмыс істеген. Прокуратура өкілдері олардың салықтан жалтарғандарын дәлелдеген. Тіпті «тыңшылық жолмен құпия ақпараттар жинады» деген айып та тағылған.
Әлемнің түкпір-түкпіріне таралып үлгерген Хаббард ілімінің тұзағына танымал өнер жұлдыздары, атақты адамдар, белгілі қайраткерлер де түскен. Киноиндустрия саласында бағы жанған Том Круз бен Джон Траволтаның саентологияның табынушысы екенін ашық дереккөздері растайды. Есі бар елдер бұл халықаралық ұйымнан етегін қымтап ұстады. 2011 жылы Мәскеу соты Хаббардтың діни еңбектерін экстремистік деп танып, Ресейде таралуына тыйым салды. 2000 жылы Франция үкіметі ұйымды тоталитарлық сипаттағы секта деп жариялады.

Қулығы мен сұмдығы

Саентологияның сұмдығы мен қулығы, қиянаты жөніндегі дау әлі күнге толастар емес. 1988 жылы француз Патриса Века оқу курсына қаражат таба алмай, терезеден секіріп өлген. Аты шулы оқиғадан кейін саентология шіркеуі Лион бөлімінің бастығы мен оның 14 сыбайласы айыпты деп танылды. Неміс металлургиялық компаниясы басқарған Рудольф Виллемстің бизнесі тоқырап, осы сектаның құрбаны болғаны жөнінде БАҚ-тар жазған. Саентология ұйымынан бас тартқандарды оққа байлап отырғаны жайында аты шулы оқиғалар интернет-ресурстарында кеңінен таралған. АҚШ теңіз жаяу әскері күштерінің бұрынғы офицері Рон Хаббард райынан қайтпай, көзбояушылық қолданып, талай қылмыстық және алаяқтық істерінің бел ортасында жүрген.

140 мың долларынан айырылған

Кәсіпкер Данил Тілеуұлы 10 жыл бойы осы ұйым қатарында болып, 140 мың долларын шығындағанын айтып, сұхбат берген. Саентологияның сандырағына еретіндер елімізде мүлдем жоқ деуге келмес. 2013 жылы дін істері агенттігінің төрағасы Қайрат Лама Шариф Алматыда «Бақытқа апарар жол» атты саентологтардың жаңа ұйымы қоғамдық бірлестік ретінде тіркелгенін хабарлады. 1996 жылдан бері Павлодар қаласында «Дианетика» орталығы қоғамдық бірлестігі қызмет етіп келеді. Аталған орталық әдебиеттерін де тарата алады. Бірақ саентологияға қатысты материалдарды таратуға тыйым салынған. Дейтұрғанымен, Хаббард іліміне тәнтілер хамелеондай құбылып, түрлі тәсілімен қапы қалдырып тұр. Алпауыт күштер қаржыландыратын біраз діни ұйым Қазақстанда заңды түрде қызмет етіп жатқанын білеміз…

«Сақтансаң, сақтармын» деген нақылды еске ұстайық, ағайын! Абайсызда саентологияның қақпанына түсіп, қан қақсап қалмаңыз!

Ұлдай Сариева,
Батыс Қазақстан облысы

19 ақпан, 20:55
Бақытжан Сағынтаев: "Біз жағымсыз сценарийдің жүзеге асуына жол бермедік"
19 ақпан, 17:20
Айдос Жұқанұлы: Алаш қайраткерлері туралы жазғанымды небәрі 50 адам оқыды
19 ақпан, 15:03
«Отты отпен сөндіреді. Тіл тартысы бар қазаққа ортақ»
19 ақпан, 12:22
Айылдан шыққан мүсінші
19 ақпан, 11:54
Баян-Өлгийдің іргетасын қалаған қазақ
19 ақпан, 11:44
Олжас Әбіл, блогер: Бізге сарапшы журналист керек
19 ақпан, 11:37
Коллектордың қақпанына түскендер
19 ақпан, 11:17
«Бай, қуатты болайық!» деуші еді...