jasqazaq.kz
Ақпарат агенттігі

Бірлігі бекем ел мықты!

29 сәуiр 2017, 12:35
352

Бірлігі бекем ел мықты!

«Ынтымағы жарасқан елге ырыс қонатынын, бірлігі елдің дұрыс болатынын» паш етуді мақсат тұтқан, көмірлі Қарағанды жерін мекендеген түрлі ұлт пен ұлыс өкілдері бас қосып, мәслихат құрды. Кеншілер қаласының «Достық үйінде» өткен дөңгелек үстелдің басында бүгінгі бейбіт өмір мен келісімнің бұдан әрі нығая түсуіне бар күш-жігерлерін жұмсайтынын жария еткен отандастар ойларын ортаға салды. Тұрақтылықты ту еткен елді мақтан тұтатындықтарын, Мемлекет басшысы Н. Ә.Назарбаевтың ұсынып отырған жаңғыру саясатынан қалыс қалмайтындықтарын мәлімдеді. «Бірлігі бекем ел мықты!» деп аталған шараға аймақ басшысы Ерлан ҚОШАНОВ арнайы қатысып, Бірлік мерекесі алдында жиналған жұртшылыққа риясыз ықыласын білдірді.

Аймақ басшысы қатысушыларды 1 мамыр – Қазақстан халқының Бірлігі күнімен құттықтап, Қазақстан халқы Ассамблеясының мерейтойлы ХХV сессиясынан кейінгі бұл басқосудың тарихи маңызына тоқталды.
Ерлан ҚОШАНОВ, облыс әкімі:
— Президент біздің қоғамның даму кезеңдерін айқындап берді. Елбасы жүйелі жаңғыру туралы айтты. Ол – үшеу. Яғни, экономикалық жаңғыру, саяси жаңғыру, рухани жаңғыру. Мемлекет басшысы айтқандай, осындай «жүйелі жаңғыру біздің бүкіл жұмыстарымыздың өзегіне айналды». Яғни, жаңғырудың негізі де, түп тамыры да – тұрақтылық, бірлік, келісім. Ассамблеядан кейін, қоғамдық сананы жаңғырту жөніндегі ұлттық комиссияның алғашқы отырысына қатыстық.Біз де өзіміз – облыста, барлығымыз бірігіп, осы орайда кешенді әрі жүйелі жұмысқа кіріссек деймін.
Сонымен қатар, облыс әкімі ұлттық мәдени бірлестіктердің келісімді, ұлтаралық татулықты нығайтудағы игі істерін де назардан тыс қалдырмады. Шараның да атауы соған негізделген. Бірлігі мықты елдің, рухы да күшті боларын тілге тиек етті. Осы жылдар аралығында еліміз ынтымаққа айрандай ұйыды. Бұл істе Қазақстан халқы Ассамблеясының үлесі зор. Елбасының бағдарламалық мақаласы Ассамблеяның рухани жаңғыруына да жол ашпақ.
Бұдан соң бірқатар ұлттық-мәдени бірлестік өкілдері, кеше Қазақстан халқы Ассамблеясының сессиясына аймақ делегациясының құрамында қатысқандар ойларын ортаға салды. Өзара пікір алмасып, сессияның тың серпін, зор қуат бергенін атап өтті. Сессияда Мемлекет басшысының сөзінен ойларына шуақ алған қауым алдағы уақытта ел бірлігін арттыруға аянып қалмайтындықтарын айтты.
Сөз алғандардың қатарында Қазақстан халқы Ассамблеясының мүшесі, ғылыми-сараптау тобының жетекшісі В.Молотов, Жезқазған қаласы қоғамдық келісім кеңесінің төрағасы, білім меценаты Б.Алтынбеков, «Арселор Миттал Теміртау» АҚ конвертор цехының жұмысшысы Д.Захаров, демократиялық күштер коалициясының мүшесі М.Ақәділова, «ЭКСПО&Women» халықаралық қоғамдық ұйымы Қарағанды филиалының жетекшісі А.Сахарова және тағы да басқа ұлттық бірлестік өкілдері, спортшылар, өндірісте еңбек етіп жүргендер бар. Өңірлердегі түрлі ұлт өкілдерінен құралған көркемөнерпаздар тікелей байланысқа шықты. Лебіздерін жеткізіп, оның соңын әнмен, күймен өрді.
Шараға қатысқан түрік қызы Расул Азами өзін «қазақпын!» деп, жастарды елді құрметтеп, оның тарихын білуге шақырды. Жұбан Молдағалиевтің «Мен – қазақпын!» поэмасынан үзінді оқып беруі көпшіліктің жүрегіне жол тапты.
Азами РАСУЛ, шараға қатысушы:
– Сонау 1944 жылы ата-әжем Қазақстанға келген. Содан бері қазақ жеріндеміз. Мен өзім түрік болсам да, «қазақпын» деймін. Мен Қазақстанда туғаныма мақтанамын. Сондықтан, жастарды елдің тарихын білуге, оны құрметтеуге шақырамын.
Кездесу соңында облыстағы түрлі ұлттық мәдени бірлестіктерге әкімнің арнайы сыйлықтары табысталды. Әкімнің сыйлығына ие болған мұндай ұлттық мәдени бірлестіктердің ұзын саны –24.
Форумға қатысушылар облыс тұрғындарына үндеу қабылдады.

«Бірлігі бекем ел мықты!» шарасына қатысушылардың Үндеуі

Құрметті Қарағанды облысының тұрғындары!
Біз, Қазақстан халқы Ассамблеясының Қарағанды облысы бойынша мүшелері, облыстың этномәдени бірлестіктерінің өкілдері, өңір қауымы Қазақстан халқы Ассамблеясының ХХV сессиясы қатысушыларының үндеуін бір ауыздан қолдаймыз.
Қарағанды облысы тұрғындарының атынан Мемлекет басшысының «Болашаққа бағдар: рухани жаңғыру» бағдарламалық мақаласындағы белгіленген міндеттерді орындауға барлық күш-жігерімізді, білімімізді, тәжірибемізді жұмсайтынымызды мәлімдейміз.
Біздің барлық бастамаларымыз бен әрекетіміз ұлттық біртектілігіміздің бірегей тетігі саналатын бәсекеге қабілетті, прагматикалық болашақ қалыптастыруға бағытталады.
Біз игі дәстүр мен ұлттық-мәдени құндылықтарды жас буынның бойына сіңіреміз. Барлық азаматтық қоғам институттары, Қоғамдық келісім кеңестері, Аналар кеңестері, Әкелер кеңестері қоғамның эволюциялық дамуының дәнекеріне айналады.
Мақсат-мүддеміздің, құндылықтарымыздың ортақ болуы, қоғамдық келісімнің күш-қуаты рухани жаңғырудың, қоғамдық сананың жаңғыруының басты нышанына айналып, Мәңгілік Еліміздің экономикалық және саяси дамуының кепілі болады.
Сондықтан, біз Қарағанды облысының барлық тұрғындарын Мемлекет басшысы Нұрсұлтан Әбішұлы Назарбаевтың Қазақстан халқы Ассамблеясының ХХV сессиясында айқындап берген міндеттерді жүзеге асыруға белсенді атсалысуға шақырамыз!

05 наурыз, 14:30
Сенімді серіктестік жалғасады
05 наурыз, 14:19
Бақытымды сағынамын...
04 наурыз, 16:13
Халықтың жадында сақталуы тиіс
02 наурыз, 12:50
Кітапқұмар мен ойынқұмар
19 ақпан, 20:55
Бақытжан Сағынтаев: "Біз жағымсыз сценарийдің жүзеге асуына жол бермедік"
19 ақпан, 17:20
Айдос Жұқанұлы: Алаш қайраткерлері туралы жазғанымды небәрі 50 адам оқыды
19 ақпан, 15:03
«Отты отпен сөндіреді. Тіл тартысы бар қазаққа ортақ»
19 ақпан, 12:22
Айылдан шыққан мүсінші