jasqazaq.kz
Ақпарат агенттігі

Самал Еслямова: Әйел бейнесі махаббаттан тұрады

11 наурыз, 13:07
641

Самал Еслямова – Сергей Дворцевойдың «Айка» фильмінде басты рөлді сомдап, былтыр Канн фестивалінде «Ең үздік әйел рөлі» үшін арнайы марапатталған актриса. Ол Алматыда Т.Жүргенов атындағы Қазақ ұлттық өнер академиясының студенттерімен кездесу барысында ауылдан да талантты әртістер шығатындығын баяндап берді.

Ол өзінің киноға қалай келгендігін былайша түсіндірді: «Солтүстік Қазақстан облысының қазіргі Аққайың ауданындағы Аралағаш ауылында мектепті аяқтағаннан кейін Петропавлдағы өнер колледжіне оқуға түстім. Сол кезде қазақ театрында қосымша жұмыс та істедім. С.Дворцевойдың алғашқы кастингіне қатысып, «Қызғалдақ» көркем фильмінде ойнадым. Колледжден кейін Мәскеудегі театр өнері университетіне (ГИТИС) оқуға түстім. Оқуды бітірген кезде С.Дворцевой «Айка» фильміне шақырды».
«Айка» фильмінде жаңа босанған әйелдің бес күндік өмірін бейнелеу, жас актрисаға оңайға түспепті. Кейіпкері – Мәскеуге жұмыс іздеп келген қырғыз қызы. Алғашқы бес күн босанған әрбір әйел үшін қиын кезең екендігі белгілі. Осы образды жасау үшін өте көп жұмыс істеген. Ең алдымен перзентханаға келіп, жаңадан босанған әйелдерді бақылаған. Олармен сұхбаттасып, жан-дүниесін түсінуге тырысқан.
Бір ғасырлық тарихы бар Мәскеудегі театр өнері университетінде білім алған ол оқу бағдарламасында ерекшелік көп екенін де айтты. Самал: «Бізге ұстаздарымыз оқып жүргенде, актерлік шеберлікті игеріп алу мүмкін еместігін айтатын. Оған жылдар бойы тәжірибе қажет. Мысалы, Мәскеудің дипломымен барлық рөлді ойнай аламын деп ешқашан айта алмаймын, – дейді.
Ал пір тұтатын актерлері туралы айтқанда Роберт де Ниро мен Дастин Хоффманды ерекше атады. Кинодан ирандық «Надера мен Симиннің ажырасуы» атты фильм қатты ұнайды екен.
Самал кастингтерге арнайы қатыспаған. Өйткені оқуды аяқтағаннан кейін бірден «Айка» фильмінің түсірілімі басталған. Киноны түсіруге алты жылдан астам уақыт кеткен. Әр мамандықтың өз қиындығы барын тілге тиек еткен актриса, ешқашан да биік шыңдарға жетемін деп ойламапты. Өзіне сондай талап та қоймаған. Ол үшін басты мәселе – киноның жақсы шығуы. Еш уақытта да танымал болуға бел бумаған.
Әңгіме арасында Петропавлда анасының үйінде болғанда, көшеде жастардың бірден танығанын да айта кетті. Тіпті суретке де түскен. Жалпы түскен фильмің фестивальдерде жүлделі орын алып жатса, бақыт құсы қолыңа өзі келіп қонады.
Бұрынғы киноларды
алсақ, мысалы «Қыз Жібек», «Менің атым – Қожа» сынды фильмдердің ғұмыры ұзақ. Оқиға желісі де есіңде сақталып қалады. Ал қазір 15 күнде түсірілген кинолар бар. Бірақ бір көргеннен кейін есіңде қалмайды. Осының себебін сұрағанымызда: «Қазіргі үрдіс солай деп айтар едім. Киноны неғұрлым жылдам түсіреді. Менің ойымша, киноны шын жүрекпен түсірген жөн. Шынайы істеуің керек. Ал шынайы жасалған дүние, ол ешқашан да сапасыз болмайды. Туындыңды көрермен жүрегіне жеткізу үшін талмай еңбектенуің тиіс. Қазіргі кинолардан байқағаным, актерлер «ой, бұл рөлді жай ойнай саламыз» деген оймен түседі. Осы кемшілік рөльде бірден көрінеді. Меніңше, бастаған іске өз тарапыңнан үлкен жауапкершілік болуы керек. Әйел бейнесі махаббаттан тұрады. Сондықтан оны шынайы бейнелеуге тырысу керек», – дейді.
Самал – бөгде жерде жүріп те өз есімі арқылы қазақ халқының мерейін асырған актриса. Оның Канн фестивалінде алған жүлдесі қазақ қыздарының да кино әлемін жаулай бастағанын байқатады. Осы жолда Самалға сәттілік тілейміз!

Мақпал Ноғайбаева

19 сәуiр, 15:50
Табиғат тартуы немесе тағы да тау кластері жөнінде
19 сәуiр, 15:20
Америкада алшаң басып жүрмейді
19 сәуiр, 15:03
Жолда келе жатырмыз...
19 сәуiр, 12:09
Жіпке байланған өмір
12 сәуiр, 17:26
"Тұлғасын газетінен танимын"
12 сәуiр, 17:09
Жусан иісін сағынған
12 сәуiр, 17:03
АЭС салуға қажеттілік бар ма?
12 сәуiр, 16:50
Байқоңыр бізге қарайды, біз...